Spinngale av meg å gå ut og forkynna at me har dradd av garde til Lofoten. Ein irriterande motvind lagar problem for framdrifta. Blir det slik i fleire veker framover, er turen avlyst. Sjølv Florø er eit fjernt mål akkurat nå. Nå ligg båten vår godt surra fast til ei flytebrygga i Korssund i Fjaler kommune i Sogn og Fjordane. Jakob Sande skreiv ein gong eit dikt om då Gud held fest i Fjaler, for oss er det definitivt lite festleg.

Laurdag 14. juni klokka 11.30 starta turen for alvor mot Lofoten. Då kasta me loss på Erøy i Erfjord og sette etterkvart kursen mot nord. På yr.no var det antyda ein del vind på Sletta nord for Haugesund, men der var det heilt fritt for vind. Me passerte Ryvarden fyr uten å ha sett antydning til sjøskvett. Så lett var det. Snart i Lofoten, tenkte me då.

Lett å passera Ryvarden fyr når Sletta ligg heilt flat.

Klokka 16.15 laurdag ettermiddag låg båten trygt til kai på Rubbestadneset på Bømlo. Det blei ein avslappande kveld og ei god natt.

Men på søndag føremiddag begynte nordavinden å grina mot oss. Sjøen dreiv og skvetta over oss nordover mot Bergen. Ingen vits i å pressa seg fram på fjorden med stor fart i slikt vêr. Det var berre å gå med redusert speed mot nord. Omtrent ved Sotra kom det ein gammal kjenning mot oss. Det gamle hurtigruteskipet «Nordstjernen» var  på veg sørover i leia. Den skal visstnok driva med cruise-trafikk langs norskekysten i sommar.

Det går jo litt diesel med motorbåt. På ein holme ved Askøy var literprisen på  kroner 9,97. Kanskje blir dette det billigaste drivstoffet på denne turen.

Ferda gjekk vidare gjennom Alverstraumen, midt i Ivar Medaas-land. Deretter forbi Mongstad og snart kryssa me Fensfjorden og fylkesgrensa mellom Hordaland og Sogn og Fjordane. Sjølv om det var motvind, var det ikkje umulig å ta seg fram. Klokka 17.10 kunne me fortøya i gjestehavna på Hardbakke i Solund kommune. Der var det sol, men litt kaldt. Eg var jo sikker på at eg var kommen til ein nynorsk-bastion då eg gjekk i land i Sogn og Fjordane. Men på puben var det berre råd å gjera seg forståeleg på engelsk for å få servering der.

Hardbakke er administrasjonssenter i Solund komune og ei populær gjestehavn for båtfolk.

I dag klokka 10.50 gjekk turen vidare frå Hardbakke. I morgon skal nordavinden spakna, ifølge Yr. Då gjeld det om å peisa på over Stadt. Vinden var så pass frisk  på vegen vidare at stemninga dalte kraftig i båten. Ikkje aktuelt å gå vidare til Florø eller Måløy i dag.

Derfor ligg me nå på gjesteplassene i Korssund og kjenner på sola som varmer  på markblomstrane på bordet trygt under ei solvarm kalesja.  Håpar yr.no får rett i morgon.