«Jøsenfjord» har stått på slippen i Dåfjord sidan 4. september. (Foto: Vidar Johannes Hauge)
Sidan 4. september har «Jøsenfjord» stått på slipp i Dåfjorden på Stord. Nå blir skroget reingjort under vasslinja. Dermed kan ein avdekka eventuelle svake punkt i dei gamle stålplatene og sørga for desse blir reparert før ein malar opp skroget og set veteranbåten på sjøen igjen.
Cato Jensen og Lars Randa i arbeid med å sjekka tilstanden på «Jøsenfjord»-skroget på slippen i Dåfjord. (Foto: Vidar Johannes Hauge)
– Eit sandblåsingsfirma har vore i sving med båten og nå er 70 pr0sent av skroget ferdig reingjort. I samband med sandblåsinga har ein laga nokre hål, men dette er ikkje uvanleg når ein går over eit slikt gammal farty på denne hardhendte måten. Desse håla blir reparerte. Akkurat nå er også botnventilane tekne ut slik at dei kan bli sjekka og kontrollerte. Det er viktig at å forhindra at ein får ubehagelege overraskingar når båten er på sjøen igjen, seier sekretær i Andelslaget MS Jøsenfjord, Cato Jensen. Han reknar med at «Jøsenfjord» er tilbake på sin faste liggeplass i Sandangervågen på Randøy i løpet av hausten.
15. juni kasta «Jøsenfjord»-mannskapet fortøyningane på Randøy. Då blei båten taua til Stord. Det er utført ein god del dugnadsarbeid også medan båten har vore i Dåfjorden.
Folk frå Bredalsholmen dokk og fartøyvernsenter i Kristiansand har fått oppdraget med å laga ein tilstandsrapport om «Jøsenfjord». Dei skal gå over heile båten medan den står på slippen.
– Nå rapporten er ferdig må me setja oss ned og planleggja den vidare framdrifta i restaurasjonsarbeidet, seier Cato Jensen.
«Jøsenfjord» kom tilbake til Ryfylkefjordane for eigen maskin 20. april 2011 etter over 30 år i Nederland. Båten blei bygd ved Christiansands Mek. Værksted i 1886 for Actieselskabet Dampskibsselskabet Lindesnæs og fekk navnet «Lindesnæs. I 1930 kjøpte Jøsenfjord Rutelag dampbåten. I 1934 blei dampmaskinen teken ut og erstatta med ein Wichmann dieselmotor på 300 HK. Denne motoren står stadig i båten og skal vera den einaste igjen av denne maskintypen. I 1962 blei «Jøsenfjord» ombygd og påsett bildekk.
70 prosent av skroget på «Jøsenfjord» er nå ferdig sandblåst (Foto: Vidar Johannes Hauge)
